من سرق التليسكوب

السلام عليكم ورحمة الله وبركاته

هايااااااااااات عليكم جميعاً
المسابقه كالتاتى
فيه تليسكوب ملك لواحد هنعرفه دلوقت اتسرق
فا شغلوا دماغاتكم واعرفوا مين اللى سرقه
من خلال الحوارات التاليه

نبدأ الاول
شخصيات القصه


ماجد : المهندس اللى بيصلح الدش ويقعد يظبط فيه لغاية ما يتقلط من القمر الصناعى

رامى : دا طالب ثانوى بيقعد فى السطوح اكتر ما بيقعد فى بيتهم
مريم : طالبه فى ثانويه بنات

عمرو : دا صاحب العماره اللى احنا فيها دلوقت ماهو انا قولت سطوح ودش يبقى اكيد احنا فى عماره موش عايزه فقاقه دى

أما احمد : دا صاحب التليسكوب اللى اتسرق وطوبعاً مش انا هههههه

يلا نبدأ بقا الحوار اللى دار بين الشخصيات المذكورة بالاعلى

ركزوا كويس..

احمد حاطط التليسكوب بتاعه فى السطوح اصله بيحب يستفرج على الكواكب من مكانه بدل ما يجيب صاروخ والحاجات دى ويولعلنا فى البلد

وهو الراجل ربنا كرمه وجاب دش جديد قام اتصل بالبشمهندس ماجد

احمد : الو ازيك يا باشمهندس ممكن تيجى تركبلى الدش

ماجد : اهلا بك اوكى انا جاى

وصل ماجد قام احمد اخده معاه السطوح علشان يركب الدش وماجد عمال يركب فى الدش ولكن مش راضى يلقط من القمر الصناعى قام قال

ماجد : بعد اذنك يا استاذ احمد انا هأستخدم الميكروسكوب بتاعك علشان اعرف مكان القمر واظبط الدش

احمد : اوكى مفيش مشكله

طيب الراجل دا هههههه

وطوبعا الدش اتظبط وماجد فى سره قال جميل التليسكوب دا بيخلينى اعرف مكان القمر من غير وجع دماغ واظبطه بسرعه

احمد بقى وهو بيستفرج على الكواكب

قام جيه استاذ عمرو

عمرو : ايه يا استاذ احمد انت مش هتريحنا من الماسوره دى بوظتلى السطوح يا راجل

احمد : من فضلك اتكلم كويس وبعدين دى مش ماسورة دا تليسكوب وانا بشوف العالم بيه وبعدين مش واخد مساحه من السطوح

عمرو : لا يا شيخ طيب ورينى كده اه تصدق صح حلوه الماسورة دى ابقى اخدها اركبها عندى بدل ماسوره الميه ..طيب يا فليسوف عصرك وزمانك يا انت يا التليسكوب دا فى البيت على فكرة انا ممكن اخد منك الماسورة دى وارميها من هنا واخلص شوفلك صرفه فيه يا اما زى ما قولتلك

احمد : ايه يا استاذ عمرو مالك انت بيه هو عملك حاجه يعنى والنبى يا شيخ نقطنا بسكاتك روح شوف المدام بتنده عليك

عمرو : بقى كده ماشى ..

احمد : ايه يا رامى ما تروح تذاكر عمال تبحلق فى مدرسه البنات ليه

ورامى مبلم ايوه ماهو احنا فى الحصه الاخيره والبناتيت خارجين من المدرسه دلوقت

وبعد كام يوم بقى

نزل الواد دا فى مرة تحت وقت خروج البنات علشان يقابل موزته

رامى : مريم ازيك واحشانى موت يا حبى

مريم : اهلا انا كويسه يا جميل ايه قاعد هنا بتعمل ايه

اكيد كنت مع ابتسام صح

رامى : لالا دا انا جاى علشانك يا روحى دا انا حتى مراقبك من اول حصه فى المدرسه وشوفت المدرسه لما رمت عليكى الكتاب

مريم : ايه دا عرفت ازاى هو انت كنت معانا فى المدرسه

رامى : انا معاكى باحساسى يا روحى وكأنى انا اللى اتضربت

صايع الواد ثبت البت

ههههههههههههههههه

مريم : طيب يا حبيبى يلا همشى انا باى باى .. امووه

ويبقى سلملى على استاذ احمد

وبكده تكون انتهت القصه

والمطلوب بقى

معرفة مين اللى سرق التليسكوب وكمان عايز دليل يقول ان هو اللى سرق اصل بكل بساطه ممكن واحد يعمل قرعه ويقول بالحظ اسم من الاربعه دول وتطلع صح

شكرا يانونا على مرورك وشكرا كمان على الكلام الجميل ده